WAHEEN SE JANEMAM IK BAAR PHIR AAGHAZ KARTE HAIN.

Waheen SE jaaneman
Ek bar Phir aagaz kerte hain.
Jahaan barso huwe hamne
Adhuri baat chori thi.

Chalo! Us mod per wapus chalein
Jis mod par hamne
Ta'alluq munqata' karne ka
Pahli baar socha tha.

Zara aawaz deker dekh lein
Phir us Zamaane ko
Zamaana... Jis me hum
Ek doosre se roz milte the
Mere lab thartharate the
To tere hontth hilte the
Tere honton ke hilte hi
Bela tafreeq har mausam
Me kaise Phool khilte the.

Main un phoolon ko chunta tha
Teri aawaaz sunta tha.
Nehayat aafreeni se
Bahut bareekbeeni se
Tere sunder saraape ko
Haseen lafzon ke paiker me
Hamesha dhal deta tha.
Qaza meri taraf aai
To hans ke taal deta tha.

Mera saara hunar shaayed
Tere marhoon-e-minnat tha

Tere naino ki masti me
Ye hasti doob jaati thi
Ajab si sansani sare badan
Me phail jaati thi

Wo baatein yaad aati hain
To Aankhein bheeng jaati hain.

Tumhare Paas sab kuch hai
Turshida badan, yaqoot lab, tirshool Aankhein..
Tumhe bhi to yaad hoga
Kahaan per khatam ki humne
Kahaani nazm ki humne

Agar sab yaad hai to Phir
Takalluf Kis liye aakhir
Sataish kis liye aakhir
Mohabbat hai to Phir ye
Aazmaish kis liye aakhir
Waheen se jaaneman ik baar
Phir aagaaz kerte hain
Jahaan barso huwe hamne
Adhuri baat chori thi......